Жақыптың он бір ұлы болады. Соның бірі он бір жасар Жүсіп нәби ұйықтап жатып бір ғажайып түс көреді. Көрген түсін атасы Жақыпқа айтады. Атасы: “Ей, ұлым, бұл түсіңді еш жанға айта көрме. Ағаларың естісе сені күндеп, залымдық істер. Сенің атың бүкіл әлемге мәшһүр болады. Он бір ағаң саған қызмет етеді”, – деп жориды. Атасының Жүсіп нәбиге айтқан сөздерін он бір ұлдың ішіндегі жалғыз қыз Дина естіп, ағаларына айтады. Мұны естіген ағалары Жүсіппен жеке кездесуді іздейді. Бір күні ағалары атасына келіп: «Біз бүгін серуенге шығамыз, бізбен бірге Жүсіп те барсын», – деп інісін сұрап алады. Кең далаға шығысымен ағалары Жүсіпті сабайды. Жүсіп нәби өзінің әдемілігімен, адамгершілік қасиетімен, ақылдылығымен дәрежесі патшалардан да артық болады. Жүсіп нәби көп жыл ғашық болып жүрген Зылиқамен қосылып, ақырында мұратына жетеді. Күншіл ағаларының өмірлері Жүсіпке қызмет етумен өтеді.

Ә.Ахметовтың жырлауындағы дастан бірнеше бөлімдерден тұрады: 1) Фархадтың тәрбиеленуі. 2) Фархадтың көрген қасіреті. 3) Патшаның ұлына тағын ұсынуы. 4) Фархадтың Сүлеймен пайғамбардың жүзігін алуы. 5) Фархад пен Шапурдың танысуы. 6) Фархадтың Шырынды көріп, есінен тануы. 7) Фархад пен Шырынның кездесуі, т.б.

Бұрынғы заманда Манап ханның қол астындағы жомарт саятшы Түмен мерген аң аулап жүріп, дәу Мөңке мергеннің тұтқынындағы сұлу Айжанды құтқарады. Айжан өз өмірін және сүйгені Жанша батыр туралы баяндайды. Жанша – Баттал батырдың жалғыз ұлы. Әкесі қайтыс болғаннан кейін дұшпандары оны өлтірмек болады. Ата-анасының батасын алған Жанша Айжанмен бірге елге аттанады. Жолда қалмақ батыры Нәдірді жекпе-жекте өлтіріп, жаумен шайқасады. Кейін тұтқынға түссе де, жаудан құтылып шығып, Айжанды іздейді. Айжанды Манап ханның адамдары алып кеткенін жаралы Түмен мергеннен естиді. Манаптың ордасына келіп, ханды өлтіріп, Айжанды босатып алады. Екеуі Түмен мергеннің, кейін Айжанның әкесі Нұралының батасын алып, туған еліне оралады. Ақыры екі жас қосылып, үлкен той жасалады.

Жырда арғынның тобықты руынан шыққан Қожаберген батырдың елін қорғаудағы ерлігі баяндалады. Ол қалмақ батыры Ұлалымен шайқаста қаза тауып, жары Таңсұлу тұтқынға түседі. Намысын сақтаған Таңсұлу қалмаққа әйел болмас үшін мұрнын өзі кесіп, күң болып өмір сүреді. Құрсағындағы ұлы әкесінің кегін алады деген үмітпен Жапалды дүниеге әкеліп, қиындыққа қарамастан тәрбиелеп, сауатын ашады. Ержеткен Жапал әкесінің өлімінің шындығын біліп, туған еліне оралады. Туыстарынан қол жинап, қалмақтарға қарсы аттанады. Жекпе-жекте Ұлалыны жеңіп, әкесі Қожабергеннің кегін қайтарады. Кейін қалмақтың ақылды әрі сұлу қызы Таңшеберге үйленеді.