Араб еліндегі Рашид байдың Махамбет атты ұлы әкесі айттырған қызды алмай, өзі іздеп табады. Бірақ оған берген сертін орындай алмай, қыздан айрылып қалып, онымен қайтадан қосылу үшін бірталай жол жүріп, көп қиындықтардан өтіп, түрлі ғажайып нәрселер көреді. Соның арасында Мысыр қаласында тұратын Самовар атты патшаның тарихын біліп алып, қызының әкесіне айтып келіп, сүйгенімен қайтадан қосылады.

Ілгері өткен заманда Қабыл атты қалада Шынтемір деген әділ патша болады. Патша бір балаға зар болып жүргенде, бір түні түсіне Қыдыр еніп, елу жасқа келгенде балалы болатынын айтады. Шынтемір балалы болып, атын Қасым қояды. Қасым оқып, біліп алып, ер жетеді. Күндердің күнінде патша түсінде ғажайып құс көріп, сол құсқа ғашық болады. Уәзірлерін, көпшілікті жинап, құсты әкелуге адам іздейді. Ешкім шықпаған соң Қасым құсты іздеп, сапарға аттанады. Көп қиындықтарды бастан кешіп жүргенде, Асылхан атты әкесінің досы болған патшаның шаһарына кез болады. Асылхан оған Қабылды есімді аярын ертіп жібереді. Мүсілім патшаның шаһарында Жанар атты сұлу қыздың суретін көріп, Қасым оған ғашық болады. Жанарды дәудің қамалынан көп қиындықпен босатып алады. Ұзақ сапардан соң Жанар мен ғажайып құсты алып келсе, елін Қарахан патша шауып кетеді. Қараханнан әкесінің кегін қайтарып, елін жаудан азат етеді. Жауды жеңген соң Қасым патша болып, таққа отырды. Қабылды аяр Қасымға уәзір болады. Сөйтіп бәрі бақытты өмір сүріп, барша мұраттарына жетеді.