Сыңсуда қыз әуелі туған жұртымен, жеңгесімен, ағасымен, анасымен арнайы сөзін арнап қоштасады. Қыз ағасына жақын жандарын табыстайды. Сыңсудан қыздың еркінен тыс ұзатылып бара жатқаны аңғарылмайды. Сондай-ақ бір ерекшелігі – бұл сыңсуда қызға жұбату сөз де айтылған. Оның мұңаюына ешқандай себеп жоқ екенін білдіріп, басу айтқан.

Бұл сыңсуда ұзатылып бара жатқан қыздың еркелетіп өсірген еліне деген қимас сезімі бар. Қыз кей-кейде еркелікке бой беріп, шаруаны ысырып қойғанын, жеңгесінің өзіне дәйім демеу болғанын жеткізеді. Артында қалған бауырымен ерекше қош айтысады.

Сыңсу мазмұнынан қыздың малға сатылып, теңдігінің сақталмағаны, өзі қаламаған жанға ұзатылып бара жатқаны байқалмайды. Қыз қазақы салтпен, жөн-жосығымен өзінің артында қалған жұртына сөзін арнайды. Еркелеп өскен елін қимай бара жатқанын білдіреді.

Қысқа-нұсқа бұл сыңсудан қыздың жасына жетпей ұзатылғаны ашық айтылған. Қыздың реніші айқын аңғарылады. Қыз өзін еркелетіп өсірген ата-анасымен қоштасады.

Сыңсу мазмұнынан қыздың теңдігі, оның өз қалауымен немесе малға сатылып кетіп бара жатқаны аңғарылмайды. Қыз тек ел-жұртына қош айтысып, өзімен тай-құлындай тебісіп өскен әпке не құрбысына сөзін арнайды. Оның басына түскен күн мұның да басына түскенін білдіреді. Туған жұртын қимай тұрғанын айтады.

Сыңсудың формасы басқа сыңсуларға қарағанда өзгеше. Қыз әуелі анасымен қоштасып, өзінің артынан іздеп тұруын сұрайды. Анасы да қызына жауап беріп, аналық ақылын айтады. Бұдан кейін туған жұртында еркелеп өскен қыз әкесімен және ағасымен, жеңгесімен, әпке-сіңлісімен ретімен қоштасады. Бұл сыңсудан қыздың өзі қаламай кетіп бара жатқаны айқын аңғарылады.

Сыңсудан қыздың өз жұртына, әкесіне қатты өкпелі екені аңғарылады. Қыз: «он төртке жасым келгенде» деп өзінің жастай ұзатылып жатқанын білдіреді. Жыр жолдарынан қыздың өзінің туған анасының жоқ-жетім екендігі де айтылған. «Қырық жеті қара қалыңға» деген жолдардан сол уақыттағы қыздың қалыңмалының құнын да білеміз.

Қысқа қайрылған бұл сыңсуда қыз анасынан бастап, бауырларымен, ең соңында әкесімен қоштасады. Көп сыңсуда қыз өзінің жастай ұзатылып бара жатқанын «Бір жазға менің көп көрді» десе, бұл сыңсуда «Бір қысқа мені көп көрді» дейді. Сыңсудың мазмұны қысқа. Десе де, қыздың мұң-зары, жұртына деген өкпесі айқын аңғарылады.