Бір бала әкесі мен шешесі өлгеннен кейін жалғыз өзі жетім қалады. Сыр бойын жағалап, аш жүрген кішкене баланы үш жасқа дейін Дихан ата мейізбен асырап өсіреді. Осылай жүріп ол аңшыларға жолығып, олардың кәсібін үйренеді. Бір күні Қармақшы атаға жолығып, осы кісінің қолында тұрақтайды. Жосалы он екі жасында аңшылықта жүріп, арыстан мен құлан атып алып, барлық кедейлерді жинап алып әбден тамаққа тойғызады. Риза болған олар Жосалыға батыр деген атақ беріп, «өзіңе ат сатып ал» деп ақша жинап береді. Олардың жинаған пұлын алып, Жосалы базарға келеді. Осы жерден өзіне ат сатып алып, еліне оралады. Кейін Қармақшының таңдап берген қалыңдығы – Күлзираға үйленеді.
