Ертеде бір ханның қызы буаз болып қалады. Хан өлтірмекші болғанда, анасы өлтіртпей, сандыққа салып, суға ағызып жібереді. Анасының бұлай істеуі алдын-ала жоспарланған іс еді. Сол тұста Домбауыл деген мерген болыпты. Анасы соған қызды құтқарып, адам көрінбейтін жерге кетуді, кейін жағдай ұмытыла бастаған соң, қайтып алып келуді тапсырады. Домбауыл сандықтағы қызды құтқарып, биік тауға шығып кетеді. Қыз күні жетіп босанады. Атын «Шың-құз» деп қояды. Кейінен хан өлген соң ханым хан болады. Сол кезде баяғы қызын, Домбауыл мергенді еліне оралтып, Шыңғысты хан сайламақшы болады. Сонда Домбауылдан туған екі бала хандыққа таласады. Сонда ханым бұларға кім садағын сағымға ілсе, сол хан болсын дейді. Сөйтіп Шыңғыстың атқан оғы сағымға ілініп, елге хан болады.