Бірде Қабанбай батырдан: «Жасыңыз ұлғайды, байлығыңыз бен ұрпағыңыз мол, енді арманыңыз бар ма?» – деп сұрайды. Сонда батыр жастық шағында қалмақтарға тұтқынға түсіп, өлім аузында жатқанда қалмақ ханының қызы жасырын құтқарып, бірге қашып шыққанын айтады. Жолда белгісіз себеппен қыз кенеттен қайтыс болады. Қабанбай оны арулап жерлеп, еліне жалғыз оралады. Батыр өмір бойы өзін өлімнен арашалаған арудың есімін де біле алмай қалғанын ең үлкен арманы ретінде айтыпты. Бұл аңыздың мазмұны Мұхамеджан Рүстемов тапсырған «Қабанбай батыр» нұсқасымен ұқсас. Екі нұсқада да негізгі сюжеттік желі сақталғанымен, көлемі жағынан айырмашылық бар.