Арқада хан болған Кенесары Арғынның қуандық, сүйіндік руларына көп қысым көрсетеді. Ресейден жеңілгеннен кейін Әулиеата маңына келіп, өзін хан ретінде мойындауды талап етеді. Сол өңірдің билеушісі Байзақ датқа сырттай бағынғанымен, іштей оған қарсы болады. Кенесары орысқа қарсы соғысу үшін қырғыздан әскер сұрайды. Қырғыздар келіспеген соң, олардың жеріне шабуыл жасап, біраз ауылын шауып алады. Кейін бағынуға келген қырғыз елшісін Наурызбайдың өлтіруі екі ел арасындағы жанжалды ушықтырады. Байзақ датқа қырғыз билеушілерімен астыртын келісіп, өз әскерін Кенесарыдан бөліп әкетеді. Соның салдарынан аз қолмен қалған Кенесары қырғыздардың қолына түседі. Артынша оны құтқармақ болған Наурызбай да тұтқынға алынады.
