Әбенов Шәкір (1900-1994) – халық ақыны, фольклоршы, сазгер, Қазақстанның еңбек сіңірген мәдениет қайраткері. Ол 1900 жылы бұрынғы Семей облысы, Абыралы өңірінде дүниеге келген. Алғаш ауыл молдасынан мұсылманша сауат ашып, кейін Семейдегі мектепте үш жыл білім алған. Жастайынан ақындық, жыршылық қабілетімен елге танылады. Шәкір Әбенов қазақ әдебиеті мен мәдениетінің көрнекті өкілдері Сәкен Сейфуллин, Ілияс Жансүгіров, Бейімбет Майлинмен жақын араласқан. Біраз уақыт Сәкен Сейфуллиннің атқосшысы болып, ақынмен бірге Қазақстанның көптеген өңірлерін аралап, халықтың тұрмыс-тіршілігімен, ауыз әдебиеті мұраларымен танысқан. Бұл сапарлар оның ақындық дүниетанымының қалыптасуына үлкен әсер етті. Ш. Әбенов қазақтың тарихи тұлғалары мен ел аузындағы аңыздарды негізге ала отырып көптеген эпикалық шығармалар жазды. Оның «Кейпін батыр», «Таңшебер – Жапал», «Ортақ арал», «Қорқыт қобызы», «Пәрмен», «Алданған қыз», «Патша мен байғыз», «Ана махаббаты», «Тоқтамыс батыр» сияқты дастандары «Шыңғыстау» (1980), «Шыңғыстау сазы» (1985) және «Дастандар» (1991) жинақтарына енген.