Құбақанбайдың қырық ұлы мен қырық қызы ел іздеп жолға шығады. Бір тоғайға аялдағанда жалмауызға тап болады. Жалмауыздың бұйрығымен кенже бала Дотан Күнікей қызды іздеуге жеті жылдық сапарға аттанады. Жол бойы ерекше қасиетке ие бірнеше серік табады. Күнікейдің еліне келгенде қызды қалмақ ханына беру туралы келісім жасалғанын естиді. Дотан қалмақтармен шайқасып, оларды жеңеді. Алайда Күнікейдің әкесі бұрынғы уәдесінен тайып, қызын бергісі келмейді. Дотан бірнеше сынақтан сүрінбей өтіп, серіктерінің көмегімен қызды алып қашады. Жолда жалмауыз кемпірді өлтіреді. Еліне оралып, ағаларын үйлендіру үшін қайтадан сапарға шығады. Осы кезде өз алдына жеке өмір сүріп жатқан қырық мың үйлі елге қалмақтар шабуыл жасайды. Дотан жауды жеңіп, сол елдің ханы болады. Қарамағындағы халықты өз еліне көшіріп әкеледі.