Бөгенбай батырдың әкесі Маянбай батыр қайтыс болған соң, оны арқа тұтып келген Құлжабек, Есімбек деген төрелер Бөгенбайдың билігін мойындауға мәжбүр болады. Бұл Бөгенбайдың перзентке зар болып, қартайған кезі екен. Жауға аттанбауға ант еткен төрелер кек алу мақсатымен Зейнеп дейтін қызы арқылы Бөгенбайдың бауыры Қасқабайды ағайындарынан бөліп, Шетқурайға көшіртеді. Мұны естіген Маянбай әулетінің батырлары Сарыбайдың бастауымен аттанып, Қасқабайдың өлімі үшін кек алып, төрелерді елден қуып, Зейнепті Сарыбайға қосады. Батырлар Бөгенбайдың батасын алып, Сырдарияның арғы бетіне жорыққа аттанады. Жолда Қанышайым деген жетім қызбен танысады. Қыздың Қапа мен Орда деген екі ағасы болады. Батырлардың айдап бара жатқан жылқылары осы Қапа батырдың жылқысы екен. Әкелері қайтыс болған соң, осы екі батыр еншіге таласып жиырма мың жылқыны екіге бөліп алады да, қыз Орда батырдың қолында қалады. Қанышайымды Қапа малы көп бір құлға бермек болады, оған Орда көнбейді екен. Жеті кенженің кішісі Тыныбек батыр қызбен сөз байласып, еліне қайтады. Келесі жылы батырлар Қанышайымды құда түсіп әкелуге аттанады. Қапа Орданы шапқанда, батырлар Ордаға көмектесіп, Қанышайымды аман-есен елге алып кетеді. Бөгенбай түс көріп, кезінде өзі өлтірген қалмақ ханының баласы Қаранай ержетіп, әкесінің құнын жоқтап, Бөгенбайды іздеп келе жатқанын біліп, елін дайындайды. Қаранайды Бексұлтан жекпе-жекте өлтіріп, бауырларынан кек алады. Перзентсіз қарт Бөгенбай жиен Ақымды бала қып алады да, екі қызға (бірі төре қызы, бірі өзінің сөз байласқан қызы) біржола үйлендіреді.
