Қарабайдың аңға шыққаны Шөже нұсқасындағыдай баяндалады. Бірақ сөзі, сөйлемдері өзгеше болып келеді. Айырмасы Қозы елінен шығып, бір жерде қонып жатып түс көреді. Түсінде әкесі: «Балам, Сарыбай қызын бермес, кері қайт», — дейді. Әкесі батасын бермесе де, Қозы сұраған соң, Баянның жолын сілтеп, «Аягөзге 14 күнде жетерсің, жол баққан кемпірге кезігерсің, содан жөн сұра»,— дейді. Қозы біраз жүргеннен кейін, кемпірге кездеседі. Қозы кемпірден Баянның жайын тұспалдап сұрайды. Кемпір Баянға барудың жөнін айтады. Қозының Шоқтерекке келгенін бір бала көріп, Баянның жеңгесіне хабарлайды. Баян жеңгесінің айтуымен торғайын жіберіп, Қозының Шоқтеректін түбінде екенін біліп, Қозыны алдырады. Бұдан кейін Қодар Қозыны Шоқтеректен тауып алып, садақпен атып өлтіреді. Басын кесіп, Сарыбайға әкеледі. Баян кұр басты құшақтап үш күн жатады. Баян Қозыны арулап қоюға Шоқтерекке келеді. Қодардың беліне арқан байлап, құдықтан тоғыз мес су алдырады. Арқанды мықтап бір терекке байлап, Қодардың ернін кесіп, көзіне пышақ шанышады. Баян Қозыға үш күндік емір тілейді. Тілегі қабыл болып, екеуі үш күн өмір сүріп өледі. Аягөздегі зиратта «Боз торғайы басында шырылдауда» деп жар аяқталады.