Барболұлы Темешәлі (1911–2007) – Көкілташ және Қарнақ медреселерінде білім алған діндар, сауатты ұстаз, репрессия құрбаны, шежіреші және экономист. Сарысу ауданы алғаш құрылған жылдары аудандық оқу бөлімінің басшысы, мектеп директоры (Бауыржан Момышұлымен бірге қызметтес болған) және аудандық жоспарлау бөлімінің бастығы қызметтерін атқарған.1932–1933 жылдардағы ашаршылық кезінде халыққа ауыр салық салып, жұмысқа жегуге наразылық білдіргені және діни наным-сенімі үшін «халық жауы» ретінде тұтқындалып, 10 жылдан астам уақыт Қарлагта жазасын өтеген. Тұтқында жүріп сауаттылығы арқасында есепші, экономист болған. Соғыс жылдарында Қарлаг басшылығына Бетпақдала жайылымының тиімділігін дәлелдеп, хат жаздыру арқылы лагерь малын аман алып қалуға себепкер болған. Долинка мен Арқа өңірінде «АЛЖИР» лагеріне айдалған Алаш арыстарының әйелдерін (Б. Майлиннің жары Күлжамал, Ж. Сәдуақасовтың жары Елизавета т.б.) қабылдап алуға қатысып, олардың аман қалуына көмектескен. Лагерьден босаған соң ұзақ жылдар бойы Жәйрем кен-байыту комбинатында экономист болып жұмыс істеді. Зейнетке шыққаннан кейін Жәйрем мешітінің алғашқы имамы болып, өңірде діни уағыз айтып, ақсақалдық құрған.