Он адам ноқталап алып шыққан дәуді жеңген Молдабайдың аты біраз жерге дейін жайылып, тарап кетеді. Сол кездерде қызай елінен Ақжігіт деген кісі Молдабаймен таныспаққа ауылына іздеп келеді. Молдабай палуанмен кездесіп, танысқан Ақжігіт Молдабайды да өз ауылына қонаққа шақырады. Сол кезде Ақжігіттің ауылында бір бай қыз ұзату тойын жасап, ат шаптырып, палуан күрестіреді. Сонда Ақжігіт пен Молдабай палуан біріне-бірі қарсы күреске шығып қалып, Ақжігіт жеңіліп, Молдабайға ренжіп қалады. Жолшыбай келе жатқан Молдабайға Мыңбай деген кісінің келіні Ақжібек деген келіншек кез болады. Келіншектің қитығына тиген палуан ойламаған жерден сол жерде жеңіліп, ұятты болып қалады. Осыдан кейін Молдабай палуан досын жеңіп, ел алдында абыройын төккеніне және келіншектен жеңіліп ұятты болған екі ісіне өкінетінін айтып жүреді екен.